Azərbaycan, Bakı/ Trend müxbir İ.Xəlilova/ İyunun 17-18-də Kişinyovda Qara dəniz Ticarət və inkişaf bankının (QTIB) İdarəçilər Şurasının 9-cu illik toplantısı keçiriləcək. Bu barədə cümə günü Azərbaycan İqtisadi İnkişaf Nazirliyindən məlumat verilib. Azərbaycandan tədbirdə ölkədən bankın idarəçisi, iqtisadi inkişaf naziri Heydər Babayev, yaxud onun müavini və maliyyə naziri Samir Şərifov iştirak edəcək.
"İştirak məsələsi hələ müzakirə mərhələsindədir",-deyə Nazirlikdən bildirilib.
Toplantı çərçivəsində biznes-forumun keçirilməsi planlaşdırılır. Burada beynəlxalq maliyyə təşkilatlarının ölkələrin iqitisadi inkişafında, xüsusilə infrastruktur, maliyyə sahəsi, həmçinin kiçik və orta sahibkarlığa yardımda rolu barədə müzakirələrin aparılması planlaşdırılır.
İnvestisiyaların cəlb olunması isə (xüsusilə də energetika və nəqliyyat sahələrinə) ayrıca mövzu olacaq. QTIB-in hər ilki toplantısında 20 ölkədən, Qara dəniz ətrafı, Qərbi Avropa, iri maliyyə təşkilatları və donor təşkilatların regionda fəaliyyət göstərən 250 nümayəndə iştirak edəcək.
QTIB 1 iyun 1999-cu ildən fəaliyyət göstərir. Bank Qara dəniz İqtisadi Əməkdaşlıq Təşkilatının üzvü olan 11 ölkənin - Albaniya, Azərbaycan, Ermənistan, Bolqarıstan, Yunanıstan, Gürcüstan, Moldova, Rusiya, Rumıniya, Türkiyə, və Ukraynanın təşəbbüsü ilə yaradılıb. O, Qara dəniz ətrafında inkişaf layihələrinə dəstək və burda təhlükəsizlik və stabillik zonasının yaradılması üçün maliyyə aləti olaraq yaradılıb.
İİN-də QTIB-in azad səhm paketinin bölüşdürülməsi məsələsinə baxılmasını istisna ediblər. Hazırda Bankın Nizamnamə Kapitalında Ermənistan, Gürcüstan və Moldovanın öz paylarını 2 faizdən 1 faizə salması nəticəsində 3 faiz bölünməmiş səhm qalmaqdadır.
Əgər hökumətin istəyi olarsa, Azərbaycan da yazılışda iştirak edə bilər, amma artıq səhm paketini bütünlüklə almaq istəyən ölkələr var. Azərbaycan isə cəmisi 2 faiz paya malikdir. QTIB-in ötən toplantısı 2006-cı ilin 11-12 iyununda Bakıda keçirilib.
