Azərbaycan, Bakı /müx. Trend İ.Xəlilova/ BMT-nin İnkişaf Proqramı Azərbaycanda biznesi dəstəkləyən və "Qara dəniz ölkələrində sərmayələrin genişləndirilməsi və ixracı" proqramını təqdim edib. Sərmayələrin genişləndirilməsi və ixracı üzrə Azərbaycan fondunun prezidentinin sözlərinə görə, BMT-nin hesabatlarında Azərbaycan kapital qoyuluşuna görə qabaqcıl yerlərdən birini tutur. Son 10 il ərzində Azərbaycan iqtisadiyyatına 20 milyarddan çox sərmayə yatırılıb. BMT-nin prezident-kordinatoru hesab edir ki, BMT-nin yeni proqramı regiona investisiya axınına təsir göstərəcək. Onun fikrincə, Qara Dəniz İqtisadi Əməkdaşlıq Təşkilatında sərmayələr əsasən enerji və infrastruktur sahəsində layihələrin reallaşmasına yönəlib.
Proqram dörd mərhələni əhatə edir. Birinci mərhələdə Qara dəniz regionunda sərmayə və ticarət imkanlarının və mühitinin yaradılması ilə bağlı araşdırmalar aparılması planlaşdırılır.
İkinci mərhələdə daha çox sərmayə yatırımı və regional ticarət üçün imkanları olan sektorlar müəyyənləşdiriləcək.
Üçüncü mərhələdə hər ölkədən yerli tərəfdaşların müəyyənləşdirilməsi məqsədilə sektor müəssisələr yaradılacaq.
Axırıncı mərhələdə detallar və bazarda aparılmış araşdırmaların köməyilə sektorlar üzrə əsas tərəfdaşlar seçiləcək.
Qara Dəniz İqtisadi Əməkdaşlıq Təşkilatı ölkələrində proqram rəhbəri Lovita Ramquette qeyd edib ki, Azərbaycan şirkətlərinin biznes potensialı 8 milyard dollardır, lakin istifadə olunan məbləğ 2,4 milyard təşkil edir. O hesab edir ki, proqramın əsas məqsədi regional iqtisadi əlaqələrə təsir göstərən və istifadə olunmayan ticarət və investisiya imkanlarının müəyyənləşdirilməsidir.