Azərbaycan, Bakı /müx. Trend İ.Xəlilova / Nazirlər Kabinetindən verilən məlumata görə,
Azərbaycan və Yaponiyanın Beynəlxalq Əməkdaşlıq Bankı (JBIC) əməkdaşlıq haqqında saziş imzalayıblar.
Sənədi Azərbaycan tərəfindən baş nazirin müavini Abid Şərifov və JBIC tərəfindən Avropa və Şərqi Asiya dövlətləri üzrə icraçı direktor Kuniaki İto imzalyıblar.
Saziş Azərbaycan və Yaponiya arasında əlaqələrin möhkəmləndirilməsinə, həmçinin JBIC-nin digər ölkələrlə müxtəlif sahələrdə əməkdaşlıq imkanlarının genişləndirməsinə təsir edəcək.
Şirkət infrastruktur sahəsində əməkdaşlığın genişləndirilməsində və kredit xətlərinin açılması vasitəsilə Azərbaycanın bank sektoru ilə əlaqələr yaratmaqda maraqlıdır. Azərbaycan Beynəlxalq Bankı ilə müqavilənin bağlanması buna sübutdur.
2006-cı ilin yazında Azərbaycan və Yaponia arasında JBIC bankının hesabına ölkəyə texniki yardım ilə bağlı müqavilə imzalanıb. 2006-cı ildən başlayaraq bank ilk dəfədir ki, Azərbaycanla bu istiqamətdə əməkdaşlıq edir. Bu günə qədər Azərbaycan JBIC-dən yalnız maliyyə yardımı alıb.
Yardım göstəriləcək əsas texniki sahələrə kiçik və orta sahibkarlığın inkişafı, su sekroru və energetika sahələri daxildir ( alternativ enerji mənbələrinin yaradılması).
Ötən il JBIC hesabına Azərbaycanda bank sistemində menecerlərin hazırlanması layihəsinin reallaşmasına başlanıb.
Əməkdaşlığın yeni sahələrinə kiçik şəhərlərdə su təchizatı və kanalizasiya sisteminin yaxşılaşdırılması da daxildir.
Bu günə qədər Azərbaycanda ən çox maliyyə vəsaiti ayrılan layihələr Yaponiyanın JBIC bankı tərəfindən həyata keçirilib.
Bankın enerji layihələrinə qoyduğu sərmayələrin həcmi 700 mln. dollar təşkil edib. Kreditlər ölkəyə kifayət qədər güzəştli şərtlərlə təqdim olunub. (İllik faizi 0,75 % olan 40 ilik ödəmə müddəti və10 illk güzəştli müddət )
