Azərbaycan, Bakı/ Trend müxbir İ.Xəlilova/ İqtisadi İnkişaf Nazirliyi tərəfindən 2006-cı il ərzində kommersiya hüquqi şəxslər tərəfindən alınmış 8 qrant müqaviləsi qeydiyyata alınıb. Bu barədə cümə günü Nazirlikdən məlumat verilib. Qeydiyyat qrant alınmasına dair müqavilələrin qeydiyyata alınması Qaydalarına müvafiq olaraq aparılıb. Bu müqavilələr üzrə alınmış vəsaitin ümumi məbləği 296,8 min dollar (təxminən 255,3 min manat) təşkil edib.
Alınmış vəsaitlər məcburi köçkünlərə mikrokreditlərin verilməsi, dil və mədəniyyəti öyrənmək üçün materialların tərcüməsi, hüquq və informasiya xidmətlərinin göstərilməsi, lizinqin inkişaf etdirilməsi, kənd yerlərində xidmətlərin göstərilməsi və s. tədbirlərin həyata keçirilməsinə yönəldilib.
Azərbaycan Respublikasının İnzibati Xətalar Məcəlləsinə uyğun olaraq Azərbaycanın kommersiya hüquqi şəxsləri tərəfindən qrant alınması haqqında müqavilələrin surətləri İqtisadi İnkişaf Nazirliyinə təqdim olunmadığına görə iki kommersiya hüquqi şəxsə müvafiq cərimə tətbiq olunub.