Azərbaycan, Bakı/ Trend müxbir S.Babayeva/ Azərbaycanda qızıl çıxarılması üzrə layihələri həyata keçirən Anglo Asian Mining PLC şirkəti Direktorlar Şurasına yeni qeyri-icraçı sədr təyin olunduğunu elan edib.
Şirkətdən bildirilib ki, yeni sədr daha öncə şirkətə qeyri-icraçı direktor kimi qoşulan (səhmdarın nümayəndəsi kimi Direktorlar Şurasına daxil olan şirkət direktoru) 64 yaşlı Xosrov Zamani olub.
Buna qədər Zamani Cənubi Avropa və Mərkəzi Asiya üzrə Beynəlxalq Maliyyə korporasiyasının direktoru vəzifəsində çalışıb. Sədr vəzifəsini daha öncə Graham Mascall tutub.
Bu gün şirkətdə şuranın tərkibinə həmçinin prezident Riza Vəziri, baş icraçı Gordon Lewis, maliyyə direktoru Richard Round, qeyri-icraçı direktor Ross Bhappu, Tim Eggar və John H. Sununu daxildir.
Anglo Asian Mining PLC şirkəti Azərbaycan hökuməti ilə imzalanmış müqavilə əsasında Azərbaycanın cənub-qərbində yerləşən altı yatağı - Gədəbəy, Ordubad, Qoşa Bulaq, Qızıl Bulaq, Vejnəli və Söyüdlüdə işləmək hüququna malikdir.