Azərbaycan, Bakı / Trend , müxbir İ.Xəlilova / Azərbaycanın Dövlət Əmlakının İdarə Edilməsi üzrə Dövlət Komitəsindən verilən məlumata görə, Azərbaycanın "Femida" MMC şirkəti investisiya müsabiqəsi vasitəsilə "Məişət maye qazı" ASC-nin səhmlərinin 99,09%-ni özəlləşdirib. İnvestisiya proqramına əsasən, iki il ərzində "Femida" müəssisəyə 3 mln. manat qoymalıdır.
Bu investisiyalar ilk növbədə, regionlarda yerləşən qaz doldurma məntəqələrinin müasir tələblərə uyğun olaraq bərpası, həmçinin yeni stansiyaların tikintisi məqsədilə nəzərdə tutulub.
İnvestisiya proqramında mövcud avdanlığın bərpası və yenilərinin alınması ilə bağlı tədbirlərin həyata keçirilməsi nəzərdə tutulub. Dövlət Komitəsində hesab edirlər ki, yatırılan vəsaitlər hesabına yanacaq qıtlığı olan rayonlarda əhalinin təbii qazla təminatı yaxşılaşdırılacaq.
Müsabiqənin şərtlərinə əsasən, sərmayədar həmçinin dövlət büdcəsinə 2 mln. manat ayırmalı və ödəniş kimi Dövlət Komitəsinə 40 min özəlləşdirmə çeki təqdim etməlidir.
"Məişət maye qazı" maye qazın alınması, satılması və nəqlində ixtisaslaşıb, heyəti 355 nəfərdən formalaşdırılıb.
2007-ci il iyunun 1-də ASC-nin nizamnamə kapitalı 3 126 291 manat təşkil edib. "Məişət maye qazı"nın öhdəliyi 1 027 729 manat, həmçinin məvacib və ona bərabər olan borclar üzrə olan borcları 25 686 manat təşkil edir. Debitor borc isə 304 303 manat təşkil edir.