Azərbaycan, Bakı/ Trend müxbir İ.Xəlilova/ Asiya inkişaf bankı (AİB) avqustun 16-da baş ofisində banka üzv ölkələr üçün sosial müdafiə indeksi metodologiyasının hazırlanması üzrə layihə çərçivəsində tədqiqatın nəticələrinin təqdimatını keçirib. Bu barədə cümə axşamı AİB-in Bakı nümayəndəliyindən məlumat veriblər. Layihə AİB-in 900 min dollar həcmində regional texniki yardımı çərçivəsində həyata keçirilir.
Layihənin həyata keçirilməsi AİB-in 2001-ci ildə qəbul etdiyi sosial müdafiə üzrə strategiyasına müvafiq olaraq iki il əvvəl başlayıb. Strategiya əmək bazarı, sosial sığorta, sosial yardım, əhalinin kasıb təbəqələrinə yardım və uşaqların müdafiəsi üzrə olan istiqamətləri əhatə edir. Bu tərkibin əsasında AİB banka üzv pilot ölkələrdə - Banqladeş, Monqolustan, İndoneziya, Nepal, Pakistan və Vyetnamda tədqiqatlar aparıb.
AİB Azərbaycanın Əmək və Əhalinin Sosial Müdafiəsi Nazirliyinə layihənin işçi variantını, tədqiqatın nəticələri, indeksin model və metodologiyasını təqdim edib. Nümayəndəlikdə tədqiqata digər ölkələrin cəlb olunmasının mümkünlüyünü istisna etməyiblər. Layihənin son variantı AİB tərəfindən təsdiq olunacaq.