Azərbaycan, Bakı / Trend , müxbir İ.Xəlilova / "Azərbaycan investisiya şirkəti" (AİŞ) sentyabrda yeni sement zavodunun tikintisi layihəsi ilə bağlı müəyyən irəliləyişlər gözləyir. Bunu AİŞ-in icraçı direktoru Anar Axundov deyib.
"Fransanın sement istehsalçısı "Lafarge" hazırda xammal yatağının müəyyənləşdirilməsi üzərində iş aparır" - deyən Axundov nəzərdən keçirilən variantlar arasında Tovuz əhəngdaşı yatağının olduğunu da istisna etməyib.
Əvvəllər layihə üzrə tikinti işlərinin ilin sonuna kimi başlanması və onların 1,5 il ərzində, yəni 2009-cu ildə yekunlaşdırılacağı barədə bəyanatlar verilirdi.
Layihə təxminən 100-150 mln. avro civarında dəyərləndirilir. Bu vəsait tamamilə yeni texnologiyaların yer alacağı müəssisənin inşasına yönələcək. Zavodun istehsal gücü 1 mln. ton civarında olacaq. Zavodun tikintisi layihəsində AİŞ-in iştirak payının 20 faiz olacağı gözlənilir. Digər hissə isə "Lafarge" hesabına təmin olunacaq.
