Azərbaycan, Bakı / Trend , müxbir İ.Xəlilova / Azərbaycan Kənd Təsərrüfatı Nazirliyi erroziyaya məruz qalmış Kür-Araz ovalığı ərazisində torpağın bərpası üçün tədbirlər hazırlayıb. Bu barədə kənd təsərrüfatı nazirinin müavini Bəhram Əliyev məlumat verib.
Əlyevin bildirdiyinə görə, bu problem hələ Sövet dönəmində quraşdırılmış və hazırda öz dövrünü başa vurmuş kollektor-drenaj sistemi ilə əlaqədar ortaya çıxıb.
Digər problem bu regionda (Ucar, Kürdəmir, Saatlı, Sabirabad) əvvəllər 1,5 metr olan qurunt sularının səviyyəsinin indi 1,8 metrə qalxmasındadır. Belə kritik həddə buxarlanma güclənir ki, bu da torpağın üst qatının miqrasiyasına gətirib çıxarır.
Nazir müavininin sözlərinə görə, bu istiqamətdə Koreya hökuməti Azərbaycana yardım göstərməyə hazır olduğunu bildirib. İnvestisiyanın həcmi hələ müəyyənləşdirilməyib. "Lakin gələcəkdə xüsusi layihə əsasında ölkədə kollektor-drenaj sisteminin bərpa olunması və torpağın şoranlaşmasının aradan qaldırılması mümkündür. Hər rayonda şoranlaşmanın səviyyəsi müxtəlifdir. Buna görə də investisiyanın həcmi də işlərin həcmindən asılı olacaq" - deyə Əliyev vurğulayıb.
Bu tədbirlər eləcə də Koreya ilə Kənd Təsərrüfatı Nazirliyi alt komitəsinin işlərin yekunu üzrə danışıqlar protokolunda öz əksini tapıb.