Azərbaycan, Bakı/ Trend / Yanvar-sentyabrda boru və dəmir yolu nəqliyyatı ilə Azərbaycandan 31 mln. tondan çox neft ixrac olunub. Bu barədə Dövlət Gömrük Komitəsinin məlumat verib. Bu dövr ərzində Bakı-Tbilisi-Ceyhan (BTC) boru kəməri ilə 25 mln. ton neft ixrac olunub. BTC ilə "Azəri-Çıraq-Günəşli" yatağından hasil olunan yüngül neft nəql edilir. Boru kəmərinin operatoru BP şirkətidir. "Azəri-Çıraq-Günəşli" yatağını işləyən iki xarici iştirakçı-Amerikanın ExxonMobil və Devon şirkətləri öz neft paylarını BTC ilə nəql etmirlər.Bu şirkətlər BTC-nin tikintisinin investorları olmayıblar və öz neftlərini dəmir yolu ilə daşıyaraq, Gürcüstanın Batumi limanından satırlar. Komitənin məlumatına görə, yanvar-noyabrda Bakı-Novorossiysk boru kəməri ilə 2 mln. ton neft ixrac edilib.Bu boru kəməri vasitəsilə Azərbaycanın Dövlət Neft Şirkətinin öz vəsaitləri hesabına yataqlardan hasil etdiyi nefti, həmçinin, xarici iştirak payı olan birgə müəssisələrin və əməliyyat şirkətlərinin qurudakı yataqlardan çıxarılan xam nefti nəql edilib. Hazırda boru kəmərinin operatoru BP şirkətidir. Lakin BP-nin "Azəri-Çıraq-Günəşli" yatağından hasil olunan nefti (ExxonMobil və Devon şirkətlərinin payı istisna olmaqla) bu marşrutla nəql etməkdən imtina etdiyi və bütün nefti BTC marşrutuna yönləndirdiyi üçün, ARDNŞ Bakı-Novorossiysk kəmərinin operatorluğunu öz üzərinə götürmək niyyətindədir. Komitə, Bakı-Supsa kəmərinin təmirə dayandırılması səbəbindən, yanvar-sentyabrda bu istiqamətdə neft nəql edilmədiyini bildirir. Bu istiqamətdə neftin nəqli 2006-cı ilin yanvarından dayandırılıb. Boru kəmərində texniki problemlər aşkarlanıb və kəmərin operatoru onların həlli ilə məşğuldur. Kəmərin operatoru BP şirkətidir. Fəaliyyəti dayandırılanadək "Azəri-Çıraq-Günəşli" yatağından hasil olunan yüngül neft bu kəmərlə nəql edilib. Komitənin məlumatında yanvar-noyabrda dəmir yolu ilə 4.2 mln. ton neftin ixrac olunduğu deyilir. Dəmir yolu ilə Qara dəniz limanlarına ABŞ-ın ExxonMobil və Devon şirkətlərinin "Azəri-Çıraq-Günəşli" yatağından hasil olunan yüngül neft daşınır. Bundan əlavə, dəmir yolu ilə, Azərbaycan vasitəsilə Qazaxıstan və Türkmənistanın tranzit xam nefti ixrac edilir.
...