Azərbaycan, Bakı/ Trend , müxbir İ.Xəlilova/ AzDRES-İmişli elektrik ötürücü xətlərinin çəkilməsi layihəsi üzrə Azərbaycanın Alman İnkişaf Bankı KfW ilə maliyyə əməkdaşlığı haqqında müqavilə qüvvəyə minib. Layihənin maliyyələşdirilməsi üçün bank 30 mln. avro ayıracaq. Bu barədə hökumətdən məlumat veriblər. Kredit, iki ili güzəştli dövr olmaqla, 12 ilə və 0.75 illik faiz dərəcəsi ilə təqdim olunur. Layihənin reallaşdırılmasına başlanılması ilə əlaqədar hazırlıq tədbirlərinin müzakirəsi üçün bankın elektroenergetika üzrə eksperti Klaus Müller dekabrda Bakıda olub. Müqavilə 2007-ci il iyunun 27-də Bakıda imzalanıb. Müqaviləyə görə, benefisiar kimi çıxış edən "Azərenerji" SC elektrik ötürücü xətlərinin tikintisini 2009-cu ilədək başa çatdırmalıdır. Layihə AzDRES-dən (Mingəçevir) İmişliyədək 195 km uzunluğunda elektrik ötürücü xətlərinin çəkilişini nəzərdə tutur. Bundan əlavə, Goranboyda yarımstansiyanın tikintisi və ayrıca özək yaradılması vasitəsilə, 330 kVt gücündə olan İmişli yarımstansiyasında elektrik enerjisinin verilməsi sahəsinin genişləndirilməsi planlaşdırılır. EÖX-in tikintisindən sonra elektrik ötürücü xətlərinin gücü hazırki 200 mV-dən 700 mV-dək artacaq.
...
