Azərbaycan, Bakı, 08 aprel / Trend / Xəzərin Azərbaycan sektorundakı "İnam" perspektivli strukturunda ikinci kəşfiyyat quyusunun yan qazma lüləsi qazılacaq. Bu barədə layihəyə yaxın mənbə məlumat verib.
"İnam"dakı INX-2 quyu lüləsinin qazılması zamanı yeddidüymlük tamamlayıcı ətraf sütunun altında buxar təzyiqinin kəskin enməsi və buruq məhlulunun boru kənarı boşluğa axması müşahidə olunub, mənbədən xəbər verilir. Sıxlığı endirilmiş buruq məhlulunun istifadəsi ilə dövriyyəni bərpa etmək cəhdləri açıq lülədə yaranmış təzyiq müxtəlifliyi səbəbindən uğurla nəticələnməyib. Bunu nəzərə alaraq, BP şirkəti tərəfdaşları ilə birgə quyunun həmin sahəsinin sementləşdirilməsi və 5350 metr layihə dərinliyində olan yan qazma lüləsinin qazılması qərarını verib.
Ekspertlərin fikrincə, "Fasilə" layının aşağı qatındakı buxar təzyiqinin enməsi quyunun bilavasitə tektonik sahəyə düşməsini göstərir.
Quyu Bakıdan 140 kilometr cənubda, təxminən 225 kvadrat kilometri əhatə edən müqavilə sahəsində qazılır. Müqavilə sahəsində suyun dərinliyi şimalda 45 metrdən cənubda 200 metrədək dəyişir. "İnnam"ın minimal dərinliyi dörd metrdir.
"İnam" layihəsinin iştirakçıları bunlardır: ARDNŞ (50 faiz), BP (25 faiz -layihənin operatoru), Koreyanın Milli Neft Korporasiyası (20 faiz) və "Shell" (5 faiz).