Azərbaycan, Bakı, 30 may/ Trend / Azərbaycanın Dövlət Neft Şirkəti "Palçıq vulkanı" yatağında yerləşmiş 1146 meydançasında qazılmış birinci quyunun istismarına başlayır. Bu barədə ARDNŞ-ın cümə axşamı yayılan məlumatında deyilir. Gələcəkdə bu meydançada daha 17 quyu qazmaq nəzərdə tutulur.
Quyu "Qala" lay dəstəsində qazılıb. Quyunun 1649-1640 metr dərinliyində deşmə işləri aparılıb. Quyunun sutkalıq debiti 15 ton təşkil edir. "Palçıq vulkanı" yatağı "Neft Daşları" neft-qazçıxarma idarəsinin tərkibinə daxildir.
Bu il "Neft Daşları"nda 955 min ton həcmində neft hasilatı proqnozlaşdırılır. Lakin, bu ilin yekunları üzrə hasilat həcmi 1 mln. tona çata bilər.
ARDNŞ geoloqlarının qiymətləndirmələrinə əsasən, "Neft Daşları" yatağında neftin qalıq həcmi 30 mln. ton təşkil edir. Dövlət Neft Şirkəti 2010-cu ilədək bu yataqdan neft hasilatını artırmaq üçün 78 quyu qazacaq, yeni platformaların tikintisi nəzərdə tutulur.
Məqalə müəllifi ilə əlaqə ünvanı: [email protected]