Azərbaycan, Bakı, 03 iyun / Trend , müxbir S.Əliyev/ Azərbaycan Dövlət Neft Şirkəti (ARDNŞ) iri perspektivli strukturların müstəqil işlənmə imkanlarını nəzərdən keçirir. Əvvəllər sözügüdən tədqiqatlar xarici şirkətlər tərəfindən aparılırdı.
Çərşənbə axşamı "Xəzər neft və qaz - 2008" sərgisinin açılışında ARDNŞ-ın geologiya, geofizika və yataqların işlənməsi üzrə vitse-prezidenti Xoşbəxt Yusifzadə jurnalistlərə bildirib ki, "Qarabağ", "Əşrəfi" və "Dan Ulduzu" strukturlarının işlənmə imkanlarının qiymətləndirilməsi aparılır. Sözügedən strukturlarda əvvəllər əcnəbi şirkətlər fəaliyyət göstərib, lakin ehtiyatların iqtisadi cəhətdən cəlbedici olmadığı qənaətinə gəliblər.
"Sözügedən strukturlarda qazma işləri 2008-ci ildən sonra başlaya bilər", - deyə Yusifzadə bildirib.
Dünya bazarlarında hazırda bir bareli 125-130 dollara çatan neftin qiymətinin yüksək olduğu bir şəraitdə bu strukturların işlənməsi ilə bağlı cəlbedicilik 10-12 il əvvəlki dövrlə müqayisədə əhəmiyyətli dərəcədə artır. Beləki, sözügedən dövrdə xarici şirkətlər bu strukturların istismarından imtina etmişdi. O dövrdə neftin bir bareli 18-25 dollar dəyərində idi.
2007-ci ildə "Wintershall" alman şirkəti "Əşrəfi" strukturunun birgə işlənməsinə dair Azərbaycan Dövlət Neft Şirkəti ilə danışıqlar aparılması haqqında memorandum imzalayıb. Daha sonralar "Wintershall" bəyan edib ki, sözügedən strukturun "Qarabağ" adlı digər perspektivli struktur ilə birləşməsi mümkün olmadan işlənməsini səmərəsiz hesab edir. ARDNŞ "Wintershall" şirkətinin strukturları birləşdirmək təklifindən imtina edərək bildirmişdi ki, "Qarabağ" strukturunu şəxsi vəsaiti hesabına istismar etmək niyyətindədir və onun digər sahə ilə birləşdirməyi planlaşdırmır. İlkin hesablamalara görə, "Əşrəfi" yatağının ehtiyatları 35-40 mln. ton neft və 20-25 mlrd. kub metr qaz həcmində qiymətləndirilir.