Azərbaycan, Bakı, 16 iyul/ Trend / İzmirdə, İdarə Heyəti üzvlərinin növbəti toplantısında bir müddət əvvəl Azərbaycan Dövlət Neft Şirkətinin (ARDNŞ, ingilis abbreviaturasında SOCAR) iştirak etdiyi şirkətlər alyansının 51 faiz iştirak payı aldığı Türkiyənin "Petkim" neft-kimya zavodunun istehsalının genişləndirilməsi məsələsi müzakirə edilib. Bu barədə ARDNŞ-ın yaydığı məlumatda bildirilir.
Bundan əlavə, şirkətin texniki-təsərrüfat problemləri müzakirə edilib. Müşavirədə Dövlət Neft Şirkətinin prezidenti Rövnəq Abdullayev iştirak edib.
İdarə Heyətinin üzvləri İzmir əyalətinin Əliağa regionunda yaşayan vətəndaşların sosial vəziyyətinin yaxşılaşdırılması məsələsini nəzərdən keçiriblər. Bu rayonda həmçinin Heydər Əliyev adına ixtisaslaşdırılmış litseyin açılması planlaşdırılır. Tədrisi Türkiyə sənayesi üçün aktual olan ixtisaslar üzrə aparmaq nəzərdə tutulur. Məzunlar gələcəkdə "Petkim"də işlə təmin olunacaqlar.
SOCAR/Turcas/Injaz alyansı "Petkim" holdinqinin səhmlərinin 51 faizini $2,04 mlrd.-a alıb. İlin ikinci yarısından şirkət idarəçiləri alyansı müəssisədə konkret işlərə başlamaq niyyətindədir. Alyans yeddi-səkkiz il ərzində holdinqə $10 mlrd. sərmayə yatırmaq niyyətindədir. Müəssisənin bazasında kömür və qazla işləyəcək iki elektrik stansiyası tikiləcək.
SOCAR/Turcas/Injaz-ın Petkim-istehsalat imkanlarının müasirləşdirilməsinə yatırdığı investisiyalar bu müəssisənin Türkiyə bazarındakı rolunu hazırki 27 faizdən 40 faizədək artıracaq. Hazırda Türkiyə lazımi kimya məhsullarının 70-75 faizini idxal edir. SOCAR/Turcas/Injaz-ın Petkim-in inkişafına yatırdığı investisiyalar məhsul idxalını 30 faizədək azaltmağa imkan verəcək. Hər il Türkiyə bazarında kimya məhsullarına olan tələbat 12 faizədək artır.
SOCAR/Turcas/Injaz Türkiyədə, kimya müəssisələrini xammala təmin etmək üçün Petkim-in istehsalat obyektlərinin yaxınlığında NEZ tikmək niyyətindədir. NEZ-in güman edilən illik emal gücü 6 mln. ton neft təşkil edəcək.
Petkim plastik qablaşdırmalar, parçalar, PVC, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsullarının dörddə birini ixrac edir.
