Azərbaycan, Bakı, 12 avqust/ Trend , müxbir S.İlhamqızı/ Bakı -Tbilisi - Ceyhan boru kəməri ilə neftin nəqli bir həftə ərzində bərpa ediləcək. Bu barədə Trend -a Türkiyənin Enerji və Təbii Sərvətlər Nazirliyinin mətbuat katibi Mehmet Akif Şan məlumat verib.
"Dünən saat 9.55 - dən yanğının söndürülməsinə başlanılıb və saat 11- də artıq yanğın sönüdürlüb. Borudakı xam neft isə kəmərin yaxınlığında hovuza boşaldılıb" - deyə mətbuat katibi bildirib.
Onun sözlərinə görə, partlayış zamanı boruda 10 min barel xam neft olub. Şan bildirib ki, nə qədər neftin yandığı, ümumilikdə layihəyə nə qədər ziyan dəydiyi hələ dəqiqləşdirilir. Nazirlik nümayəndəsi onu da bildirib ki, mütəxəssislər tərəfindən partlayışın səbəblərinin araşdırılması davam etdirilir.
"Hadisə yerində olan mütəxxəssislər partlayışın texniki nasazlıq üzündən baş verdiyi qənaətindədirlər. Hadisənin terror aktı olması ehtimalı da araşdırılır, lakin mütəxəssislərin rəyinə əsasən, partlayışın texniki səbəblərdən baş verməsi versiyası üstünlük təşkil edir" - deyə nazirlik rəsmisi bildirib.
Onun sözlərinə görə, yanğının səbəblərinin araşdırılması və yekun rəyin əldə edilməsi, həmçinin, nasosun təmiri bir həftə ərzində başa çatıdırılacaq.
"Bir həftəyə kəmərdə neftin nəqli bərpa olunacaq və xam neft əvvəlki qaydada axmağa başlayacaq" - deyə Şan bildirib.
Bakı -Tbilisi- Ceyhan boru kəmərinin dayandırılmasına Şərqi Türkiyə ərazisində neft kəmərində sürgülərdən birində yanğın səbəb olub.
BTC neft kəmərinin ümumi uzunluğu 1768 kilometrdir; 443 km -Azərabaycan, 249 - Gürcüstan, 1076 km - Türkiyə ərazisindən keçir. Boru kəmərinin tikintisi 2003 - cü ildə, onun neftlə doldurulması 2005 - ci il mayın 18 - də başlayıb.
BTC-nin tikintisi $4 mlrd. başa gəlib. Bu tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir. BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); TRAO (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Xəzərin Azərbaycan sektorunda "Azəri" - "Çıraq" - "Günəşli" yataqlarının tammiqyaslı işlənilməsini həyata keçirən Azərbaycan Beyunəlxalq Əməliyyat Şirkəti (operator BP) bu boru kəmərində yanğınla əlaqədar hasilatı azaldıb. BP- də hasilatın nə qədər azaldığını bildirmirlər, lakin iyulun yekunları üzrə o sutkada, orta hesabla, 870 min bareldən çox olub.
Hasilat Bakı -Tbilisi - Ceyhan boru kəməri ilə ixracın dayandırılması və BP şirkətininin Səngəçal neft terminalında çənlərin dolması ilə əlaqədar azaldılıb.
BP- dən bildiriblər ki, "Azəri" - "Çıraq" - "Günəşli" yataqlarından hasil edilən neftin ixracı hazırda alternativ marşrutlar - Bakı -Supsa və Bakı - Novorssiysk neft kəmərləri ilə, həmçinin, dəmir yolu ilə Gürcüstanın Batumi limanına həyata keçirilir. Bütün çatdırma nöqtələri Qara dəniz sahilində yerləşir.
Müəlliflə əlaqə saxlamaq üçün elektron ünvan - [email protected]