Qazaxıstan, Astana, 11 sentyabr / Trend , müxbir K.Konırova/ "KazMunayqaz"ın keçmiş rəhbəri Serik Burkitbayev hazırda ev dustağıdır. Bu barədə Trend -ın xüsusi müxbirinə Qazaxıstanın iqtisadi və korrupsiya cinayəti ilə mübarizə Agentliyindən məlumatlı mənbə bildirib.
"Burkitbayev hazırda ev dustağıdır və ona qarşı yeni iş üzrə ittihamlar yoxlanılır", - həmsöhbət deyib.
Cümə axşamı Qazaxıstanın respublika qəzetlərinin birində anonim mənbəyə istinadən iqtisadi və korrupsiya cinayəti ilə mübarizə Agentliyinin aralarında "KazMunayqaz"ın keçmiş rəhbəri də olmaqla bir neçə şəxsə qarşı Cinayət Məcəlləsinin 176-cı maddəsi (başqasının mülkiyyətinin mənimsənilməsi və ya israf edilməsi) ilə cinayət işi açdığı barədə məlumatlar yayılıb.
Qəzetin verdiyi məlumata görə, maliyyə polisinin müstəntiqləri təhqiqata Qazaxıstanın Milli Təhlükəsizlik Komitəsi ilə eyni vaxtda başlayıblar. Bu təhqiqatda Burkitbayev dövlət mülkiyyətinin talan edilməsində şübhəli bilinən şəxslərdən biridir. Söhbət Talqar rayonunun Almatı vilayətində yerləşən "Naukoqrad" kompleksinə maliyyə axınlarının qeyri-qanuni ayrılmasından gedir.