Azərbaycan, Bakı, 29 yanvar/ Trend , müxbir E.İsmayılov/
Ekol Mühəndislik Xidmətləri QSC "Kürsəngi" və "Qarabağlı" yataqlarını işləyən Salyan Oil əməliyyat şirkəti ilə imzalanmış müqavilə çərçivəsində, bu yataqların mədən sahələrində ekoloji monitorinq aparıb, - QSC - nin cümə axşamı yayılmış məlumatında deyilir. Ekol bu yataqların mədən sahələrinin karbohidrogen qazma şlamından təmizlənməsini aparacaq.
İlkin təqdiqatlara görə, quruda yerləşən bu yataqların mədən sahələrində təxminən 40 min kubmetr şlam yığılıb. Layihənin realizəsinə 2009 - cu il yanvarın 5-də başlanılıb və ilin sonunda başa çatacaq.
Bu layihənin realizəsinin əsas məqsədi göstərilmiş sahələrin ekoloji vəziyyətinin yaxşılaşdırılması, QSC - nin yeni tərəfdaşları ilə əlaqələrin genişləndirilməsi, beynəlxalq maliyyə böhranı şəraitində müəssisənin iqtisadi imkanlarının artırılmasıdır.
Monitorinq zamanı layihə sahələrinin fiziki - coğrafi vəziyyəti öyrənilib, qaz şlamının kimyəvi xüsusiyyətlərinin öyrənilməsi üçün çoxsaylı qrunt nümunələri, şlam və su nümunələri götürülüb, eləcə də layihə sahələrində çoxsaylı su yığımlarının miqdarı, koordinatları və parametrləri müəyyən edilib.
Monitorinqə yekun vurulduqdan sonra, alınmış nəticələrə müvafiq olaraq, layihə - smeta sənədləşdirməsinin hazırlanmasına başlanılacaq.
"Kürsəngi - Qarabağlı" müqavilə sahəsini işləyən Salyan Oil şirkəti 2009 - cu ildə yataqlarda dörd istismar quyusu qazmağı planlaşdırır.
"Kürsəngi - Qarabağlı" yatağının işlənilməsinə dair sazişin müddəti 25 ildir. Layihənin səhmdarları aşağıdakılardır: ARDNŞ - 50 faiz, hər birinin 25 faiz iştirak payı olan iki Çin şirkəti -- China National Oil & Gas Exploration and Development Corp. (CNODC) və CNPC (Hong Kong) Ltd. (CNPCHK).
Abşeron yarımadasında mövcud ekoloji problemlərin həlli üçün 2006 - cı il martın 1 - də yaradılmış Ekol Mühəndislik Xidmətləri QSC - nin həmtəsisçiləri SOCAR (Azərbaycanın Dövlət Neft Şirkəti) - 51 faiz və Lancer S.A. Services şirkətidir - 49 faiz.
Müəlliflə əlaqə saxlamaq üçün elektron ünvan: [email protected]
