Azərbaycan, Bakı, 2 fevral / Trend , müxbir E.İsmayılov/ "Enerji sahəsində Azərbaycan qanunvericiliyinin Avropa qanunvericiliyinə uyğunlaşdırılması Azərbaycanın enerji daşıyıcılarının Avropaya nəqlinə imkan yaradacaq", - bazar ertəsi Azərbaycan yanacaq və energetika nazirinin müavini Gülməmməd Cavadov deyib.
"Biz Azərbaycanın enerji sahəsindəki qanunvericiliyini Avropa hüquq bazasına uyğunlaşdırmaq istəyirik. Bu bizə öz enerji daşıyıcılarımızı Avropaya çatdırmaq imkanı verəcək", - Cavadov Azərbaycanın Energetika və Sənaye Nazirliyi və Almaniyanın Federal İqtisadiyyat və Texnologiyalar Nazirliyi arasında energetika sahəsində tvininqin təqdimetməsinə həsr olunmuş konfransda bildirib.
Konfransda tvininq layihəsinin rəhbəri, Almaniyanin Federal İqtisadiyyat və Texnologiyalar Nazirliyinin nümayəndəsi Günter Vaşek deyib ki, "enerji sahəsində layihənin həyata keçirilməsi Azərbaycanın Avropaya inteqrasiyasına öz müsbət təsirini göstərəcək".
"Həyata keçirilən layihənin beş tərkib hissəsi var - enerji sahəsində Avropa hüquq bazası ilə tanışlıq, elektrik enerjisi və qaz sahəsində qanunvericiliklərin yaxınlaşdırılması, elektrik enerjisi şəbəkələrinin kodeksinin hazırlanması, qaz şəbəkələri kodeksinin hazırlığı, bu sahələrdə operator funksiyalarının bölüşdürülməsi.", - Vaşek bildirib.
Bu layihənin qısa müddətdə həyata keçirilməsi üçün müxtəlif metodlar tətbiq etmək lazım gələcək. Almaniyada 140 bu cür tvininq layihəsi həyata keçirilib.
"Biz Azərbaycanın elektrik və qaz sisteminin inkişafını görmək istəyirik", - Vaşek qeyd edib.
Bu layihənin əsas məqsədi enerji sahəsində Azərbaycanın hüquqi bazasını Avropa İttifaqının hüquqi bazasına yaxınlaşdırmaq, eləcə də Azərbaycаn qanunvericiliyinin bu sahəsində struktur islahatlarının keçirilməsidir. Bu layihə Azərbaycan və Avropa İttifaqı arasında 1999-cu ildə imzalanmış əməkdaşlıq müqaviləsinə dəstək çərçivəsində həyata keçirilir. Tvininq layihəsinin 18 ay ərzində realizə olunması planlaşdırılır. Bundan başqa layihənin hazırlanması və işlərin dayandırılmasına əlavə üç ay da ayrılacaq.
Maliyyə xərclərinin ümumi dəyəri Avropa Komissiyasının ayırdığı 1,1 milyon avro həcmində qiymətləndirilir. Tvininq layihəsi özündə layihə üzrə bütün öhdəlikləri nəzərdə tutan və beş hissədən ibarət olan planı təcəssüm etdirir. Bu öhdəliklərin çərçivəsində işçi qrupların yaradılması, seminarların aparılması, Avropa ilə tanışlıq səfərləri də nəzərdə tutulub.
Tvininq layihəsinin əsas məqsədi elektrik enerjisi və qaz sahəsində Azərbaycan qanunvericiliyinin Avropa qanunvericiliyinə (Acquis Communautaire) yaxınlaşdırılmasıdır. Acquis Communautaire özündə Avropanın energetika sahəsində 20 qanun layihəsini birləşdirir. Bu qanun layihələri eletrik enerjisi və qaz, isitmə generatorları, abunəçilərə verilən informasiyanın səmərəliliyi, alternativ enerji mənbələrinin stimullaşdırılması və başqa məsələləri əhatə edir.
İlk addım kimi ikisi elektrik enerjisi və qaz sahəsində göstərişlər, sonuncusu isə Avropanın elektrik enerjisi və qaz sahəsində məsələlərin idarə olunması üzrə qrupun yaradılmasını əhatə edən - üç Avropa qanun layihəsi seçilib.
Məqalə müəllifi ilə əlaqə ünvanı: [email protected]