Azərbaycan, Bakı, 13 mart / Trend /
Bu il ərzində yeraltı qaz anbarlarında istifadə olunmamış qaz ehtiyatları ötən ilin göstəricisini ötə bilər. 2008-ci ildə istifadə olunmamış qaz ehtiyatı qalığı təqribən 380 mln. kubmetr təşkil edib. Bu barədə Azərbaycanın neft-qaz sahəsindəki mənbə bildirib.
Cari ilin aprel ayından (əvvəlki illərdə olduğu kimi) Azərbaycan yeraltı qaz anbarlarına qaz vurmağa başlamaq niyyətindədir. Qaz anbarlarına 2008-2009-cu illər payız-qış dövründə istifadə olunmaq üçün təqribən 1,4 mlrd. kubmetr qaz vurulub (əvvəlki mövsümdən qalmış 380 mln. kubmetr qaz ehtiyatı ilə birgə).
Hazırda Azərbaycan iki yeraltı qaz anbarından - Qaradağ və Kalmazdan istifadə edir.
Hazırda Qaradağ qaz anbarının fəal gücü 500 mln. kubmetr qaz təşkil edir. SOCAR şirkəti 2010-cu ilin mart ayınadək Qaradağ yeraltı qaz anbarının gücünün 1,4 mlrd. kubmetrədək genişləndirilməsi üzrə işlərin birinci fazasını başa çatdıracaq.
Kalmaz qaz anbarının fəal gücü 1,1 mlrd. kubmetr qazdır.
Yeraltı qaz anbarları Azərbaycana yay mövsümündə artıq qalan qazın saxlanılması və onların qışda istifadə olunması üçün lazımdır.
