Azərbaycan, Bakı, 24 aprel / Trend , müxbir E.İsmayılov /
Gələn həftə "Heydər Əliyev adına" Dərin Özüllər Zavodu Xəzərin Azərbaycan hissəsində yerləşən "Ümid" perspektivli qazkondensat strukturuna tikilməkdə olan ikibloklu "Ümid-1" platforması üçün vertolyot meydançası göndərməyi planlaşdırır. Bu barədə cümə günü SOCAR-da (Azərbaycan Respublikası Dövlət Neft Şirkəti) işlərə yaxın mənbə bildirib.
Mayda strukturdakı yeni platformadan qaz və qazkondensatın yoxlanılması üçün kəşfiyyat qazmalarının aparılması planlaşdırılır.
Bu strukturda kəşfiyyat qazmalarının aparılmasında əsas məqsəd ölkədə qaz hasilatını artırmaqdır.
"Zavodda platforma üçün nəzərdə tutulan yalnız vertolyot meydançası qalıb ki, onu da gələn həftə göndərməyi planlaşdırırıq", - deyə mənbə qeyd edib.
Perspektivli "Ümid" dəniz strukturunda çıxarılması ehtimal olunan ümumi qaz ehtiyyatları 300 mlrd. kubmentr təşkil edir. "Ümid"də güman olunan qazkondensat ehtiyatları isə 30-40 mln. ton həcmindədir.
Tikilməkdə olan "Çıraq-6" platformasının bazasında inşa edilən "Ümid-1" platforması proqram çərçivəsində ən iri obyektdir. Onun hündürlüyü 72 metr təşkil edir. Platforma suyun 58 metr dərinliyində "Bulla dəniz" dəniz yatağından 15 km. aralıda yerləşəcək. SOCAR-dan əvvəllər verilən məlumata görə, platformadan altı qaz quyusunun qazılması planlaşdırılır.
Məqalə müəllifi ilə əlaqə ünvanı: [email protected]
