Azərbaycan, Bakı, 2 may / Trend / İran Azərbaycandakı "Şah Dəniz" qaz-kondensat yatağının işlənməsinin ikinci mərhələsinə 1,7 milyard dollara yaxın vəsait yatırmaq niyyətindədir. Bu haqda İranın Mehr informasiya agentliyinə NİCO şirkətinin rəhbəri Cavad Asimpur deyib.
"Hazırda şirkətin sözü gedən layihədə pay iştirakı 10% təşkil etsə də NİCO pay iştirakını artırmaq istəyir", - Asimpur qeyd edib.
Onun sözlərinə əsasən, layihənin reallaşmasının ikinci mərhələsi 2013-2014-ci illərdə başlayacaq.
"Şah dəniz" yatağının işlənməsinə dair saziş 1996-cı il iyunun 4-də imzalanıb. Saziş iştirakçıları bunlardır: BP (operator- 25,5%), Statoil (25,5%), NICO (10%), Total (10%), LUKAgip (10%), TPAO (9%), ARDNŞ (10%).
Yatağın qaz ehtiyyatı 1,2 trilyon kub metr həcmində qiymətləndirilir. Hazırda gündəlik qaz hasilatı 22 milyon kub metrə bərabərdir. Yaxında yeni quyunun istifadəyə verilməsi hesabına bu rəqəm 27 milyon kub metrə qədər qaldırılacaq. "Şah Dəniz"də qaz hasilatına 2006-cı ilin dekabrında start verilib. Hazırda qaz Türkiyə və Gürcüstana ixrac edilir. Qaz yataqdan birbaşa Cənubi Qafqaz qaz kəməri ilə (Bakı-Tbilisi-Ərzurum) nəql edilir.
Qaz hasilatının birinci mərhələsi çərçivəsində yataqdan il ərzində 9 milyard kub metr qaz çıxarmaq nəzərdə tutulub. Reallaşması 2014-ci ildə başlanacaq ikinci mərhələdə isə yataqda qaz hasilatı il ərzində 20 milyon kub metrə dək artırılacaq.
Məqalə müəllifi ilə əlaqə ünvanı: [email protected]
