Azərbaycan, Bakı, 20 may / Trend , müxbir E.İsmayılov /
Mayın 20-nə olan məlumata görə, Gürcüstanın daxili bazarında SOCAR-ın (Azərbaycan Respublikası Dövlət Neft Şirkəti) 141 mln. kubmetr şəxsi qazı satılıb. Bu barədə çərşənbə günü SOCAR Energy Georgia-nın (SOCAR-ın törəmə müəssisəsi) rəhbəri Mahir Məmmədov bildirib.
SOCAR yanvarda Gürcüstanın daxili bazarında 38,2 mln. kubmetr, fevralda 35,7 mln. kubmetr, martda 26,2 mln. kubmetr, apreldə isə 33,9 mln. kubmetr Azərbaycan qazı satıb.
SOCAR Energy Georgia Azərbaycan qazının Bakı-Tbilisi-Ərzurum qaz kəməri ilə nəqli və Rusiya qazının Gürcüstandan traziti çərçivəsində Gürcüstanın payına düşən qazın distribusiyası ilə də məşğuldur.
Mayın 20-nə olan məlumata görə, Gürcüstan bazarında "Şahdəniz" yatağından çıxarılan təqribən 166,5 mln. kubmetr qaz satılıb. Yanvar-apreldə "Şahdəniz" yatağından çıxarılan qazın 144 mln. kubmetri Gürcüstan bazarında satılıb.
Məmmədov bildirib ki, hazırda Gürcüstanın qaza olan tələbatı əlverişli hava şəraiti səbəbindən azalıb. Həmçinin, maye qaza da tələbat azalıb. Lakin bu aydan ölkədə maye qaza olan təlabatın artacağı gözlənilir.
SOCAR Energy Georgia-nın həmtəsisçiləri bunlardır: SOCAR - 51 faiz, Petro-Trans FZCO - 32,7 faiz və İvan Çxartişvili - 16,3 faiz.
Məqalə müəllifi ilə əlaqə ünvanı: [email protected]