Azərbaycan, Bakı, 21 may / Trend , müxbir E.İsmayılov /
Bakı və Ankara arasında Türkiyəyə "Şahdəniz" yatağından təchiz edilən qazın qiymətinin razılaşdırılması məsələsi ilə bağlı danışıqlar davam edir. Bu barədə cümə axşamı SOCAR-ın (Azərbaycan Respublikası Dövlət Neft Şirkəti) yüksək vəzifəli nümayəndəsi deyib.
"Məsələ ilə bağlı 7 raundda danışıqlar aparılıb və qazın qiymətinin dəyişdirilməsi istiqamətində irəliləyişlər var. Lakin tərəflər qiymət düsturuna fərqli yanaşır və məsələ razılaşdırılma mərhələsindədir", - SOCAR-ın nümayəndəsi qeyd edib.
Azərbaycan "Şahdəniz" yatağının işlənməsinin birinci mərhələsi çərçivəsində Türkiyəyə təchiz edilən qazın qiymətini artırmaq niyyətindədir. Hazırda Azərbaycan qazı Türkiyəyə 1000 kub metri 120 dollara təchiz edilir. Lakin bu qiymət 2001-ci ildə əlldə olunmuş razılaşmada əksini tapıb.
Türkiyə ilə imzalanmış razılaşmaya əsasən, "Şahdəniz" qazının qiymətinə təchizatdan bir il sonra baxıla bilər. Deməli, yeni qiymətlər 2008-ci il aprelin 15-dən tətbiq ediləcək.
Müqaviləyə əsasən, Türkiyə "Şahdəniz" layihəsinin işlənməsi üzrə birinci mərhələ çərçivəsində bu yataqdan 6,6 mlrd. kubmetr qaz əldə etməlidir. Layihə üzrə tərəfdaşlar artıq 2009-ci ildə bu tədarük həcminə nail olacaqlar.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, SOCAR - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Məqalə müəllifi ilə əlaqə ünvanı:[email protected]