Azərbaycan, Bakı, 05 avqust / Trend , müxbir E. İsmayılov /
"Tengiz" yatağından çıxarılan Qazaxıstan neftinin ARDNŞ-in Gürcüstanın Qara dəniz sahilində - Kulevidəki neft terminalı vasitəsilə nəqlinə yalnız terminalda aparılan dənizin dibini dərinlətmə işləri başa çatandan sonra başlanıla bilər. Bunu çərşənbə günü neft ixracı bazarındakı vəziyyətlə tanış mənbə deyib.
"Qazaxıstan neftinin Kulevi terminalı vasitəsilə boşaldılması yalnız dibin dərinləşdirilməsi işlərinin başa çatdırılması və bir sıra məsələlərin razılaşdırılmasından sonra başlaya bilər", - mənbə deyib.
Mənbənin dediyi kimi, terminalda dənizin dibini dərinlətmə işlərinin yaxın günlərdə başa çatdırılması planlaşdırılır. Razılaşdırılmalı digər məsələləri mənbə açıqlamayıb.
Terminalın dibinin dərinləşdirilməsi işlərinin avqustun ilk on günlüyündə başa çatdırılması planlaşdırılır. Bu işlərin yekunlaşdırılmasından sonra terminal iri tutumlu tankerləri qəbul edə biləcək. Plana əsasən, dərinləşdirmə işləri prosesində ümumilikdə təxminən 2,2 milyon ton qrunt ayrılacaq, bir müddət öncə terminaldakı mənbə deyib.
Bu il Azərbaycan ərazisi ilə təxminən beş milyon ton Qazaxıstan neftinin daşınması planlaşdırılır. Bunun üç milyondan çoxu "Tengiz" neftinin payına düşür.
"Tengiz" yatağının işlənilməsi ilə Qazaxıstan-Amerika birgə müəssisəsi "TengizŞevroyl" məşğul olur. Amerikanın "ChevronTexaco" şirkəti 2008-ci ildə Bakı-Tbilisi Ceyhan (BTC) boru kəməri ilə "Tengiz" neftinin nəqlinə başlayıb. Müqavilənin şərtlərinə əsasən, "Tengiz" nefti Gürcüstan limanlarınadək (Kulevi və Batumi) BTC və dəmir yolları vasitəsilə daşınacaq.
Statistika Dövlət Komitəsinin məlumatına əsasən, ilin birinci yarısında BTC ilə 907,7 min ton "Tengiz" nefti daşınıb.
Gürcüstanın Kulevi Qara dəniz terminalının sahibi ARDNŞ, Batumi terminalının sahibi isə "QazMunayQaz"dır.
Məqalə müəllifi ilə əlaqə ünvanı: [email protected]