Azərbaycan, Bakı, 8 avqust / Trend /
Türkiyənin Energetika naziri Taner Yıldızın Azərbaycana səfəri zamanı "Şah Dəniz" Azərbaycan qazkondensat dəniz yatağının işlənməsinin birinci mərhələsi çərçivəsində qiymətlərin tənzimlənməsi, bu yatağın işlənməsinin ikinci mərhələsi çərçivəsində həcmin müəyyənləşdirilməsi, eləcə də Türkiyə ərazisindən Azərbaycan qazının tranziti məsələsi müzakirə olunacaq. Bu barədə Türkiyənin "Anadolu" agentliyi ölkənin Energetika Nazirliyindəki mənbəyə istinadən məlumat verir. Yıldız Azərbaycana "Nabukko" layihəsi və Rusiyayla energetika sahəsində əməkdaşlıq (xüsusən də, "Cənub axını" qaz kəməri layihəsi üzrə) çərçivəsində müqavilənin imzalanmasından sonra gəlib.
"Ümid edirəm ki, danışıqlar uğurla aparılacaq. Türkiyə üçün 2015-2016-cı illərə qaz məsələsi müzakirə olunacaq. Bu səfər çərçivəsində hansısa müqavilənin imzalanacağı hələki məlum deyil. Danışıqlar aparacağıq", - Yıldız deyib.
Bu gün Azərbaycan qazı Türkiyəyə 1000 kub metrinə 120 dollar qiymətlə verilir. Türkiyənin daxili bazarında istehlakçılar üçün qazın qiyməti hər 1000 kub metri üçün təxminən 380 dollardır.
Türkiyəylə imzalanmış müqavilədə göstərildiyi kimi, "Şah Dəniz" qazının qiymətinə tədarükə başlayandan bir il sonra yenidən baxıla bilər, yəni yeni qiymətlər 2008-ci il aprelin 15-dən tətbiq edilə bilər.
Müqaviləyə əsasən, Türkiyə layihənin işlənməsinin birinci mərhələsi çərçivəsində "Şah Dəniz" yatağından 6,6 milyard kub metr qaz almalıdır. Layihə üzrə tərəfdaşlar tədarükün bu həcminə bu il çatacaqlar.
"Şahdəniz" yatağının işlənməsinə dair müqavilə 1996-cı il iyunun 4-də imzlanıb. Layihə iştirakçıları bunlardır: BP (operator) -25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO- 9 faiz, ARDNŞ - 10 faiz.
