Azərbaycan, Bakı, 26 avqust / Trend /
Hazırda "Bakı-Tbilisi-Ceyhan" (BTC) neft kəməri ilə suktada 850 min barel neft nəql edilir. Bu barədə Azərbaycanın neft sənayesindəki mənbədən məlumat verilib.
Sutkada təxminən 100 min barel neft "Bakı-Supsa" qərb boru kəməri marşrutu ilə nəql edilir. Bu kəmər iki il ərzində təmir işlərinə dayandırılmışdı. Ancaq ötən ilin sonundan etibarən bu marşrutla neft nəqli bərpa edilib.
Bu marşrutlarla nəql edilən neft "Azəri-Çıraq-Günəşli" yataqlar blokundan hasil edilir. Bu yataqlarda orta sutkalıq hasilat həcmi təxminən 900 min bareldir. BTC ilə nəql edilən neftin bir hissəsi - təxminən 40 min barel "Tengiz" yatağından (operator Chevron) əldə edilən Qazaxıstan neftinin payına düşür.
BTC-nin tikintisi 4 mlrd. dollara başa gəlib. Bu tikinti işləri boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); ТРАО (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
"Bakı-Supsa" boru kəmərinin operatoru, "Azəri-Çıraq-Günəşli" yataqlar blokunu işlədən şirkətlərin daxil olduğu Azərbaycan Beynəlxalq Əməliyyat Şirkətidir.
