Azərbaycan, Bakı, 27 avqust / Trend /
"2010-cu ilə qədər ARDNŞ-nin (Azərbaycan Respublikası Dövlət Neft Şirkəti) Gürcüstandakı törəmə şirkəti - SOCAR Georgia Gas idarə etdiyi qazpaylayıcı şəbəkələrdəki abunəçilərin sayını 57 minədək artıracaq", - ARDNŞ-nin məlumatında deyilir.
Azərbaycanlıların kompakt yaşadığı gürcü rayonlarındakı abunəçilərin sayı belə olacaq: Marneulidə 10 min, Qardabani - 7 min, Bolnisi və Dmanisi - hərəsi 5 min.
"Gürcüstan Prezidentinin sərəncamına əsasən, Qardabani və Dmanisi rayonları şəbəkələrinin 100, Bolnisinin isə 42,55 faizi SOCAR Georgia Gas-ın idarəetməsinə verilib", - ARDNŞ-nin məlumatında bildirilir.
Bununla yanaşı, məlumatda qeyd edilir ki, ARDNŞ və onun törəmə şirkətlərinin Gürcüstanın erməni əhalisinin sıx yaşadığı Samsxe-Cavaxetiya rayonlarına heç bir aidiyyatı yoxdur və bu ərazidə iş aparan distribusiya şirkətləri ilə heç bir münasibətə malik deyil.
Gürcüstanda SOCAR Georgia Gas şirkətinin (SOCAR Energy Georgia-nın törəmə müəssisəsi) istifadəsində olan 31 qaz təsərrüfatı infrastrukturunun qazlaşdırılması və bərpası üzrə üç illik layihənin birinci ilinə lazım olan sərmayənin həcmi 48 milyon laridir (təxminən 28,6 milyon dollar).
Bu vəsaitlər hesabına 57 min yeni potensial istehlakçı üçün 800 kilometrə yaxın ümumi uzunluğa malik qazpaylayıcı şəbəkə tikiləcək.
Bir müddət əvvəl SOCAR Energy Georgia-dakı mənbə deyib ki, bu layihə üçün üç ildə nəzərdə tutulan sərmayənin həcmi ilkin 40 milyon dollardan 70-80 milyon dollara qədər arta bilər. "İlkin mərhələdə bu layihə çərçivəsində nəzərdə tutulan minimal məbləğ 40 milyon dollar təşkil edirdi. Bu minimal limit idi. Paylaşdırıcı şəbəkələrin bərpası nəzərə alınmaqla, qazlaşdırma işinə məxaricin həcmi təxminən 70-80 milyon dollar təşkil edə bilər", - mənbədən deyilib. Hazırda qazlaşdırma prosesi davam edir və artıq sentyabrda bir çox kəndlərə qaz verilişini başlamaq planlaşdırılır.
Mənbənin bir müddət əvvəl dediyinə görə, hazırda SOCAR Georgia Gas-ın istismarında olan qazpaylayıcı şəbəkələrin tələbatı ildə təxminən 80-90 milyon kubmetrdir. Bu il ərzində şirkət bu şəbəkələrin abunəçilərinin sayını 56 mindən 60 minə qədər artırmaq istəyir. Birinci mərhələdə daha 15 min abunəçi şəbəkələrə qoşulacaq. Üç il ərzində şirkət abunəçilərin sayını 150 minə qədər artırmağı planlaşdırır.
Dekabrın 26-da ARDNŞ və Gürcüstan hökuməti 30 qazpaylayıcı təsərrüfat və qazpaylayıcı şəbəkənin istifadəyə ötürülməsi haqqında müqavilə imzalayıb. Bu şəbəkələr Gürcüstanın Kaxetiya, Msxeta-Mtianeti, Şida və Kvemo-Kartli, Acarıstan, Quriya, İmeretiya və Sameqrelo kimi regionlarını əhatə edir. Onlar 24 şirkət tərəfindən istismar edilib.
Apreldə SOCAR Energy Georgia Gürcüstanın azərbaycanlıların yığcam şəkildə yaşadığı Marneuli rayonunun qazpaylayıcı şəbəkəsini də istifadəyə alıb. Bu daha 31 qaz təsərrüfatı deməkdir. Əvvəllər bu şəbəkənin sahibi "Wissol" şirkəti olub. Bu şirkət qazı SOCAR-dan alaraq, onun Marneuli ərazisində satışı ilə məşğul olub. İndi bu istiqamətdə bütün işləri SOCAR Energy Georgia həyata keçirəcək.
Bu paylayıcı şəbəkənin alınması, onların inkişafı və idarə edilməsi 40 milyon dollarlıq sərmayə proqramına daxil edilməyib.
Məqalə müəllifi ilə əlaqə ünvanı: [email protected]
