Azərbaycan, Bakı, 03 noyabr / Trend , müxbir İ.Xəlilova/
On illik fəaliyyəti ərzində Azərbaycan Dövlət Neft Fondunun (ADNF) gəlirləri 27 milyard dollar təşkil edib. Bu barədə fondun icraçı direktoru Şahmar Mövsümov çərşənbə axşamı parlament komitələrinin iclasında "Dövlət büdcəsi - 2010" layihəsinin müzakirəsi zamanı bildirib.
Onun sözlərinə görə, cari ilin sonuna Neft Fondunun aktivlərinin 14 milyard dollar səviyyəsində olacağı planlaşdırılır.
"Bizim hesablamalarımıza görə, 2010-cu ildə "Azəri-Çıraq-Günəşli" yataqlar blokundan ixrac edilən neftdən 6,7 milyard dollar, "Şahdəniz" yatağından ixrac edilən qazdan isə 200 milyon dollar əldə ediləcəyi planlaşdırılır", - Mövsümov deyib.
"ARDNŞ ölkədə infrastruktur və sosial əhəmiyyətli layihələrin maliyyələşdirilməsini davam etdirəcək. Bu məqsədlə 509 milyon manat vəsait yönəldiləcək", - maliyyə naziri Samir Şərifov deyib. Bu vəsaitlər Samur-Abşeron suvarma sisteminin yenidən qurulması və Oğuz-Qəbələ zonasından Bakıya su kəmərinin çəkilməsi üzrə layihələrə, yeni Bakı-Tbilisi-Qars dəmiryolunun çəkilməsi layihəsinin maliyyələşdirilməsinə, 2007-2012-ci illərdə gənclərin xarici ölkələrdə təhsil almaları üçün Dövlət Proqramının maliyyələşdirilməsinə, qaçqın və məcburi köçkünlərin sosial şəraitinin yaxşılaşdırılması üzrə tədbirlərin görülməsinə yönəldiləcək.
2010-cu ildə dövlət büdcəsindən 4,915 milyard manatlıq vəsaitin transferi gözlənilir.
Oktyabrın 1-nə görə ADNF-nin aktivləri ilin əvvəli ilə müqayisədə 19,24 faiz artaraq 10 716,2 milyon manat (13 337,5 milyon dollar) təşkil edib.
Noyabrın 03-nə olan cari məzənnə 0,8033 AZN/USD təşkil edir.
Məqalə müəllifi ilə əlaqə ünvanı: [email protected]