Azərbaycan, Bakı, 13 noyabr / Trend /
ARDNŞ-nin Geologiya və geofizika idarəsi "Kalmaz" yeraltı qaz anbarı sahəsində üçölçülü seysmik tədqiqatları başa çatdırıb. Bu barədə idarənin məlumatında deyilir.
Tədqiqatlar qaz anbarının üçölçülü modelinin yaradılması və onun genişləndirilməsi imkanlarının qiymətləndirilməsi məqsədilə aparılıb.
Məlumatda deyilir ki, tədqiq edilən sahələrdən alınan seysmik məlumatların keyfiyyəti qənaətbəxş olaraq qiymətləndirilir. Artıq məlumatların izahı və emal edilməsi üzrə işlərə başlanılıb.
Azərbaycanda cəmi iki yeraltı qaz anbarı var. Bunlardan birincisi fəal gücü 500 milyon kubmetr olan "Qaradağ", ikincisi isə "Kalmaz" qaz anbarlarıdır. Bu qaz anbarının fəal gücü 1,1-1,2 milyard kubmetr təşkil edir.
Hazırda ARDNŞ "Qaradağ" yeraltı qaz anbarının genişləndirilməsi çərçivəsində aktiv işlər görür.
ARDNŞ prezidenti Rövnəq Abdullayev bir müddət əvvəl bildirmişdi ki, gələn ilə yeni kompressor stansiyalarının və boru kəmərlərinin tikintisi üzrə işlərin başa çatıdırılması və quyuların təmir edilməsi planlaşdırılır. "Qaradağ" qaz anbarının genişləndirilməsinin birinci mərhələsi çərçivəsində onun fəal gücünün 1,4 milyard kubmetrə çatdırılması planlaşdırılır. İkinci faza çərçivəsində isə bu göstərici 2,3 milyard kubmetrədək artırılacaq.
Abdullayevin fikrincə, yaxın zamanlarda Azərbaycanın qaz anbarlarına 3 milyard kubmetrədək yanacaq doldurmaq mümkün olacaq. Üçüncü mərhələdə isə bu rəqəmi 5 milyard kubmetrədək artırmaq olacaq. Bu, Azərbaycanın daxili bazarının qazla təminatının artırılmasına imkan verəcək və ölkənin ixrac imkanlarını xeyli genişləndirəcək.