Azərbaycan, Bakı, 18 noyabr / Trend , müxbir E.İsmayılov/
Qara dənizi Mərmərə dənizi ilə birləşdirən Bosfor boğazının güclü duman səbəbindən bağlanması Azərbaycanın ARDNŞ-yə məxsus Gürcüstandakı Qara dəniz neft terminalı Kulevinin fəaliyyətinə təsir göstərməyib. Bu barədə çərşənbə günü neft-qaz bazarındakı mənbədən bildirilib.
"Hazırda terminal normal rejimdə fəaliyyət göstərir, boğazın bağlanması terminalın işinə və gəmilərin qəbuluna heç cür təsir göstərmir", - mənbə bildirib.
RİA Novosti agentliyinin əvvəlcədən bildirdiyi kimi, Bosfor boğazı bütün gəmilər üçün yerli vaxtla 02:15-də bağlanıb. Boğazın açılma vaxtı hələlik məlum deyil.
Türkiyənin Bosfor və Dardanel boğazları Qara dəniz limanlarından, o cümlədən Kulevi, Poti, Batumi və Novorossiyskdən neftin tədarükü üçün yeganə su yoludur.
Kulevidəki neft terminalı öz işinə ötən ilin yayında başlayıb. Terminalın yükboşaltmasının ümumi gücü üç milyon ton neft, üç milyon ton dizel yanacağı, dörd milyon ton mazut daxil olmaqla ildə 10 milyon ton neft-maye yükü təşkil edir. O, eyni vaxtda 168-dək vaqon sistern qəbul edə bilir. Rezervuar parkının ümumi həcmi 320 min kubmetr təşkil edir. İki il ərzində terminalın buraxılış gücünün 15-20 milyon tonadək artırılması planlaşdırılır.
Məqalə müəllifi ilə əlaqə ünvanı: [email protected]