Azərbaycan, Bakı, 23 noyabr / Trend , müxbir E.İsmaylov/
Hazırda "Azəriqaz" İstehsalat Birliyi yanında "Bakqaz" (Bakıda qazın paylanması və satışı) İdarəsi tərəfindən Bakı şəhərinin qaz sisteminə sutkalıq qaz verilişi noyabrn 18-nə olan məlumata əsasən, əvvəlki 6,55 milyon kubmetrə nisbətdə 8,5 milyon kubmetr təşkil edir. Bu barədə idarədəki mənbədən bildirilib. Bir müddət əvvəl "Azəriqaz" QSC İB qismində ARDNŞ-in tərkibinə daxil edilib.
"Havaların soyuması ilə əlaqədar olaraq paytaxtda istehlak artır. Hazırda istehlak nəzərəçarpacaq dərəcədə artıb və bu göstərici sutkada 8,5 milyon kubmetr təşkil edir", - mənbə deyib.
Yanvar-oktyabr aylarında paytaxtın qaz sisteminə 1,9 milyard kubmetrdən çox məişət qazı verilib.
Oktyabr ayında paytaxtın qaz sisteminə sentyabr ayında verilən 108 milyon kubmetrə nisbətdə 123,6 milyon kubmetr qaz verilib. Avqustda şəhərin qaz sisteminə txminən 104 milyon kubmetr, iyulda təxminən 109 milyon kubmetr, iyunda 114 milyon kubmetrdən çox, mayda isə təxminən 141 milyon kubmetr qaz verilib.
Ötən il İB Bakının qaz sisteminə təxminən 2,45 milyard kubmetr qaz verib.
2008-ci ildə "Bakqaz" şəhərin qaz sisteminə qaz verilişinin mövsümi rejimindən (yay və qış mövsümü) tamamilə imtina edib. Bundan sonra verilən qazın həcmi istehlakçıların tələbatı ilə müəyyən edilir. Əvvəl yay mövsümündə qazın sutkalıq verilişi 3-4 milyon kubmetr, qışda isə bu rəqəm 10-13 milyon kubmetr təşkil edirdi.
Məqalə müəllifi ilə əlaqə ünvanı: [email protected]