Azərbaycan, Bakı, 11 yanvar / Trend , müxbir E.İsmayılov/
2011-ci ilin ortalarında ARDNŞ Gürcüstanda neft bazasının tikintisini başa çatdırmağı planlaşdırır. Bu barədə SOCAR Energy Georgia şirkətindən məlumat verilib.
Neft bazası Tbilisi Beynəlxalq hava limanı ilə yanaşı Kiziki küçəsində yerləşəcək. İnşaat işlərinin həyata keçirilməsi üçün şirkət 2008-ci ildə dəyəri təqribən 3 milyon dollar olan 5 hektar torpaq sahəsi əldə edib.
"Tikinti işləri davam edir və bazanın gələn ilin ortalarında istismara verilməsi gözlənilir", - mənbə deyib.
Mənbənin sözlərinə görə, hazırda ərazidə əsasən torpağın hamarlaşdırılması və bünövrələrin bərkidilməsi işləri aparılır.
Gürcüstandakı neft bazasının inşasının layihə işlərini Azərbaycanın "Encotec" mühəndis şirkəti aparıb. Şirkət mühəndis-layihə xidmətlləri, layihələrin idarə edilməsi, tikinti və tikinti-montaj işlərinə nəzarət, qurulma və istismara vermə xidmətləri göstərir.
Neft bazasında ümumi tutumu 20,5 min ton olan 24 rezervuar yerləşdiriləcək. Bunlarda benzin, dizel və aviakerosun kimi əlvan neft məhsulları mühafizə ediləcək. Həmçinin maye qazın saxlanması üçün ümumi tutumu 1200 kubmetr olan 4 rezervuar yerləşdiriləcək. Yeni neft bazası layihəsi çəkisi 3 min ton olan bitum quyusunun inşasını nəzərdə tutur. Bütün bu məhsullar Gürcüstan bazarlarında satılacaq.
SOCAR Georgia-nın həmtəsiçiləri ARDNŞ (51%), Petro-Trans FZCO (32,7%) və Vano Çxartişvilidir (16,3%).
