Azərbaycan, Bakı, 08 fevral / Trend , müxbir E.İsmayılov/
ARDNŞ-nin Türkiyənin Petkim Neft-Kimya Kompleksi yaxınlığındakı Neft Emalı Zavodunun texniki iqtisadi əsaslandırılmasının (TİƏ) hazırlanması prosesi başa çatıb. Bu barədə bazar ertəsi ARDNŞ-nin Türkiyədəki nümayəndəliyinin rəhbəri Seymur Ağayev bildirib. ARDNŞ həmçinin Petkim Neft-Kimya Kompleksinin şərikidir.
"Bütün nüanslar razılaşdırılıb və TİƏ tam hazırdır", - Ağayev deyib. Fevralın sonunadək TİƏ-nin mətn variantı üzərindəki işlər başa çatacaq.
Ağayevin sözlərinə görə, hazırda layihə çərçivəsində mühəndislik işləri başlanıb. "Biz TİƏ ilə bağlı işləri başa çatdırmışıq və mühəndislik mərhələsinə keçmişik", - Ağayev deyib.
Onun sözlərinə görə, NEZ-in inşasına dair lisenziya hələlik alınmayıb. Mühəndislik mərhələsinin həyata keçirilməsinin sürəti lisenziyanın alınmasından asılı olacaq. "Lisenziyanın alınması ilə bütün işlər tam sürətlə gedəcək", - Ağayev deyib.
Türkiyə hökuməti bir müddət əvvəl ətraf mühitə təsir hesabatını təsdiq etmişdi.
ARDNŞ prezidenti Rövnəq Abdullayev daha əvvəl bildirmişdi ki, yeni NEZ-in inşası layihəsinin maliyyələşdirilməsi məqsədilə banklarla danışıqlar aparılır.
Əvvəllər Petkim-dən məlumat verilib ki, zavodun tikintisinə 2010-cu ildə başlamaq planlaşdırılır. Yeni zavod Petkim Neft-Kimya Kompleksinin xammala olan tələbatını ödəyəcək. Neft məhsullarının qalan hissəsi isə yerli və Avropa bazarlarında satılacaq. Yeni zavodun illik gücü 10-15 milyon ton məhsul təşkil edəcək.
Bir müddət əvvəl SOCAR/Turcas Petrol/Injaz Projects şirkətlər alyansı Türkiyənin Petkim Neft-Kimya Holdinqində 51 faizlik səhm paketinin alınması üzrə tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. SOCAR/Turcas/Injaz-ın Petkimin inkişafına yatıracaqları sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablar, parçalar, PVC, yuyucu vasitələr istehsal edir və Türkiyədə belə məhsulların yeganə istehsalçısıdır. Şirkət məhsullarının dörddə birini ixrac edir.