Bakı, Azərbaycan, 26 fevral / Trend , E.İsmayılov/
Azərbaycanla Gürcüstan arasında enerji körpüsünün yaradılması çərçivəsində işlərin 2011-2012-ci illərdə başa çatdırılması planlaşdırılır. Bu barədə cümə günü "Azərenerji" SC-nin prezidenti Etibar Pirverdiyev məlumat verib. "Azərenerji" Azərbaycanda elektrik enerjisinin istehsalı və paylanması ilə məşğul olur.
"Bu layihə (enerji körpüsünün yaradılması) çərçivəsində işlər 2011-2012-ci illərdə başa çatdırılacaq. Gürcüstan tərəfi 2013-ci ilədək müvafiq infrastrukturun yaradılması üzrə işləri başa çatdırmalıdır", - deyə Pirverdiyev bildirib.
Onun sözlərinə görə, 2010-cu ilin iyununda enerji körpüsü çərçivəsində Gürcüstanda müvafiq yüksəkvoltlu xəttin tikintisi üzrə elan edilmiş tenderin yekunları açıqlanacaq.
"Bu il Azərbaycan tərəfi Gürcüstan istiqamətində 500 kilovoltluq elektrik ötürücüsü xəttinin yenidən qurulması üzrə işlərə başlamağı planlaşdırır", - deyə "Azərenerji"nin rəhbəri bildirib.
2009-cu ildə "Azərenerji" 18,6 mlrd. kVt/s elektrik enerjisi istehsal edib.
