Azərbaycan, Bakı, 10 may /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Azəri-Çıraq-Günəşli" (AÇG) yataqlar blokunun işlənməsinə dair tərəfdaşlarından bu yataqlardakı dərin qaz laylarının işlənməsi üzrə cavab təklifləri gözləyir. Bu barədə bazar ertəsi Qaz Emalı Zavodunda ümummilli lider Heydər Əliyevin büstünün açılışı mərasimində ARDNŞ prezidenti Rövnəq Abdullayev bildirib.
Bundan əvvəl ARDNŞ layihə çərçivəsində öz təklifini tərəfdaşlarına təqdim edib.
"Biz tərəfdaşlarımızdan cavab təklifləri gözləyirik. Biz təklifləri aldıqdan sonra onlar qiymətləndiriləcəklər. Bundan sonra layihə üzrə qərar qəbul ediləcək", - Abdullayev deyib.
"AÇG" yataqlarının dərin laylardakı qaz ehtiyatları 500 milyard kubmetr həcmində qiymətləndirilir.
Dərin laylardakı qazın işlənməsinin hasilatın pay bölgüsü (PSA) üzrə yeni (ayrıca) layihə çərçivəsində həyata keçirilməsi planlaşdırılır.
1994-cü ildə Azərbaycanla imzalanan layihəyə görə, BP və onun "AÇG" layihəsi üzrə tərəfdaşları neft horizontlarının "Fasilə" lay dəstinədək işlənməsi hüququna malikdirlər. Eyni zamanda, müqavilədə qeyd edildiyi kimi, aşağı horizontların işlənməsi ayrıca sazişin predmetidir.
Azərbaycanın digər dəniz yataqları ilə analogiyaya görə iddia etmək olar ki, "Fasilə" lay dəstindən sonra məhz Nadkirmakinsk, Podkirmakinsk və Qala lay dəstləri də karbohidrogenlərə malikdirlər.
"Azəri-Çıraq-Günəşli" yataqlar blokunun səhmdarları bunlardır: ВР (operator - 34,1%), Chevron (10,2%), ARDNŞ (10%), INPEX (10%), StatoilHydro (8,6%), ExxonMobil (8%), TRAO (6,8%), Devon (5,6%), ITOCHU (3,9%), Hess (2,7%).