Azərbaycan, Bakı, 11 may /Trend, müxbir E.İsmayılov/
Xəzərin Azərbaycan sektorundakı perspektivli "Babək" qaz kondensat strukturunda kəşfiyyat qazması bu il həyata keçirilməyəcək. Bu barədə çərşənbə axşamı ARDNŞ-in (Dövlət Neft Şirkəti) geologiya, geofizika və yataqların işlənməsi məsələləri üzrə birinci vitse-prezidenti Xoşbəxt Yusifzadə məlumat verib.
"Bu il "Babək"də heç bir iş həyata keçirilməyəcək", - Yusifzadə bildirib.
Neft-qaz bazarındakı mənbənin bundan əvvəl verdiyi məlumata görə, "Babək" strukturundakı quyunun qazılması işlərinə bu il başlanılması planlaşdırılıb, lakin qazma işlərinin başlanılma müddəti qazmanı aparacaq şirkətdən asılıdır.
Qazma üzrə öz xidmətlərini təqdim edəcək şirkət kimi Caspian Drilling Company (CDC) çıxış edir. Mənbənin sözlərinə görə, qazma işləri "İstiqlal" yarımdalma qazma qurğusunda təmir işləri başa çatdıqdan sonra başlamalıdır.
ARDNŞ-in geoloqları "Babək" strukturunun mümkün ehtiyatlarını 300 milyard kubmetrqaz və 45 milyon ton qaz kondensatı həcmində qiymətləndirirlər.
Mənbənin dediyi kimi, "Babək"də qazma üzrə layihə tapşırığı artıq hazırlanıb. Strukturda əvvəlcə yalnız bir quyu qazılacaq, onun layihə dərinliyi 6 800 metr təşkil edəcək.
CDC ARDNŞ və Santa Fe Corporation şirkətlərinin birgə müəssisəsidir.