Аzərbaycan, Bakı, 27 may /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) Xəzər dənizinin Azərbaycan sektorunda "Günəşli" yatağının "Günəşli-4" platformasında qaz-kompressor stansiyasını payızda istismara verməyi planlaşdırır. Bu barədə cümə axşamı ARDNŞ-dən verilən məlumatda deyilir.
Hazırda mayenin (neft və qaz-kondensat) nasosla çıxarılacağı nasos stansiyasının yenidən qurulmasının başa çatması üzrə işlər aparılır.
"Kompressor və nasos stansiyaları eyni vaxtda işə başlamalıdırlar, lakin sonuncunun yenidən qurulması üzrə işlər gecikdiyinə görə kompressor stansiyasının istismara verilməsi prosesi ləngiyir", - mənbə deyib.
Onun sözlərinə görə, kompressor stansiyasının tikintisi üzrə işlər başa çatıb. Nasos stansiyasının yenidən qurulması çərçivəsində yeni avadanlıqların bir hissəsi alınıb və hazırda montaj işləri aparılır.
"Ümid edirik ki, payıza qədər bütün işlər başa çatacaq. Biz bu layihəni soyuqlar düşənə qədər təhvil vermək istəyirik", - mənbə bildirib.
"Günəşli" yatağı "28 May" Neft-Qaz Çıxarma İdarəsinin balansında yerləşir.
Layihədən əvvəl infrastruktur olmadığına görə qaz atmosferə buraxılırdı ki, bu da ətraf mühitə böyük zərər verirdi. Lazımi infrastrukturun yaradılması və bu layihənin həyata keçirilməsi 150 milyon dollara başa gəlib. Atmosferə ildə 150-250 milyon kubmetr həcmində qaz tullantıların buraxılması müşahidə olunub.
