Azərbaycan, Bakı, 1 iyun /Trend, müxbir E.İsmayılov/
Hazırda Mingəçevir su anbarında suyun səviyyəsi maksimal həddədir. Bunu çərşənbə axşamı "Azərenerji" ASC-nin (Azərbaycanda elektrik enerjisi istehsalı və paylanması) vitse-prezidenti Marlen Əsgərov deyib.
"Baxmayaraq ki, bu gün suyun bir hissəsini istifadə etmişik, Mingəçevir su anbarında suyun səviyyəsi maksimal həddədir. Biz suyun səviyyəsini aşağı salmalıyıq", - Əsgərov deyib. Kürün səviyyəsi düşdükcə su anbarındakı suyun səviyyəsi də yavaş-yavaş düşməyə başlayacaq.
Onun sözlərinə görə, Kürün Xəzər dənizinə töküldüyü yerdə suyun səviyyəsinin artması ilə əlaqədar olaraq su anbarından suyun çıxması qabiliyyəti məhdudlaşdırılıb. Su anbarında suyun səviyyəsinin nominal həddi 83 metr, maksimal həddi isə 85,5 metrdir.
Son həftələr ərzində Kürün məcradan çıxması və digər çaylarda daşqınlar səbəbindən, 40 rayonun ərazisində subasma halları qeydə alınıb. Bu təbii fəlakət nəticəsində 20 minə yaxın ev su altında qalıb, 300-dən çox ev dağılıb, 2 min ev qəzalı vəziyyətdədir və 76 min hektar əkin və örüş sahələrini su basıb.
Fəsadların aradan qaldırılması məqsədilə Bəhramtəpə su qovşağında Araz çayının yeni qolu açılıb.
