Аzərbaycan, Bakı, 19 iyun /Trend, müxbir S.Ağayeva/
Yunanıstan Azərbaycanla alternativ enerji sahəsində əməkdaşlıq etməyə hazırdır. Bu barədə Afinada azərbaycanlı jurnalistlərə Azərbaycanın Yunanıstandakı səfiri Rəhman Mustafayev bildirib.
"Azərbaycanın zəngin təbii enerji ehtiyatları var, lakin hamı bilir ki, bu əbədi deyil və nə vaxtsa tükənəcək. Bəzi yunan şirkətləri artıq Azərbaycanın alternativ enerji mənbələri ilə təminatına maraq göstərirlər", - Mustafayev deyib.
Onun sözlərinə görə, alternativ enerji ilə bağlı böyük olmayan layihələr var. "Yunanıstan şirkətləri Azərbaycanda bu sahə üzrə işləməkdə maraqlıdırlar və bu, bizim üçün də maraqlıdır. Azərbaycanda enerjiyə qənaət texnologiyalarına keçid üçün şərait var", - səfir əlavə edib.
