Azərbaycan, Bakı, 19 iyul /Trend, müxbir İ.Xəlilova/
Almaniyanın "Blohm & Voss Repair" şirkəti Azərbaycanda dəniz platformalarını avadanlıqla təchiz etmək imkanlarını müzakirə edir. Bu barədə bazar ertəsi Bakıda olan Almaniyanın İqtisadiyyat və Texnologiyalar Federal Nazirliyinin MDB ölkələri ilə iqtisadi əməkdaşlıq departamentinin rəhbəri Andreas Noyman bildirib.
"Xəzər dənizində ofşor hasilat Azərbaycan tərəfindən yaxşı inkişaf etdirilir. Mənə elə gəlir ki, "Blohm & Voss Repair" şirkətinin Azərbaycana öz texnologiyalarının təchizi sahəsində əməkdaşlıq qurmaq üçün yaxşı imkanları var", - Noyman bildirib.
Onun sözlərinə görə, şirkət ölkədə artıq müxtəlif danışıqlar aparıb.
"Blohm & Voss Repair" Almaniyada neft-qaz sektorunda boru kəməri əməliyyatları üçün aparıcı avadanlıq istehsalçısıdır. Şirkət Almaniyada neft-qaz sənayesi üçün istehsal edilən yardımçı alətlərin ixracı ilə məşğul olur.
