Azərbaycan, Bakı, 21 iyul /Trend, müxbir E.İsmayılov/
ARDNŞ cari ilin sonuna, gələn ilin əvvəlinə Xəzərin Azərbaycan sektorunda yerləşən "Ələt-Dəniz" dəniz yatağında yeni neft-qaz quyusunu istismara verməyi planlaşdırır. Bu barədə ARDNŞ-dakı mənbə çərşənbə günü məlumat verib.
Onun sözlərinə görə, proqnozlara əsasən, quyudan sutkada 40 ton neft və 20 min kubmetr qazın hasil edilməsi planlaşdırılıb.
"Quyunun layihə üzrə dərinliyi 4000 metr təşkil edir ki, bundan da artıq 2400 metri qazılıb", - mənbə deyib.
Mənbənin sözlərinə görə, kəşfiyyat quyusunun qazılması planlaşdırılıb. Qazma işlərinə çox güman ki gələn il başlanılacaq.
ARDNŞ-nin balansında olan yataqlarda belə quyuların qazılması şirkətin neft və qaz hasilatı üzrə səviyyəsinin saxlanılması məqsədini güdür. Hazırda Azərbaycanda 59 yataq var. Onlardan 18-i dənizdə yerləşir.
