Azərbaycan, Bakı, 5 avqust /Trend/
Atmosfer havasının avtonəqliyyat vasitələrindən atılan zərərli qazlarla çirklənməsinin qarşısını almaq məqsədi ilə ARDNŞ "Avro" standartlarına keçir. Bu barədə şirkətin cümə axşamı yaydığı məlumatda deyilir.
Bu məqsədlə 2009-cu ildə "Bibiheybətneft", "Balaxanıneft", "Qum adası" NQÇİ-lərin ərazilərində ARDNŞ-nin Ekologiya İdarəsi tərəfindən üç Ekoloji Ölçmə Məntəqəsi tikilib və müasir tipli yeni avadanlıqlarla təmin olunub.
ARDNŞ-nin müəssisə və təşkilatları ilə ikitərəfli razılaşma müqavilələri bağlandıqdan sonra Ekologiya İdarəsinin Ekoloji Ölçmə Mərkəzinin əməkdaşları bağlanmış müqavilələrin şərtlərinə əsasən, həmin idarələrin balansında olan nəqliyyat vasitələrini ekoloji müayinədən keçirirlər. Nəqliyyat vasitələri ekoloji standartlara uyğun olmadığı halda akt tərtib olunur.
Ekoloji Ölçmə Mərkəzinin fəaliyyət dairəsini genişləndirmək məqsədi ilə Mərkəz Azərbaycan Respublikası Standartlaşdırma, Metrologiya və Patent üzrə Dövlət Komitəsi tərəfindən AZS Milli sertifikatlaşdırma sistemində müstəqillik akkreditasiyasından keçirilib və akkreditasiya şəhadətnaməsi alınıb. Sistemin tələblərinə uyğun olaraq, Ekoloji Ölçmə məntəqələri qaz analizator cihazları ilə təmin edilib.
İyulun 1-dən etibarən Azərbaycan ərazisində "Avro-2" standartları tətbiq edilməyə başlayıb və bununla əlaqədar olaraq, ARDNŞ balansında olan nəqliyyat vasitələrinin bu standartlara uyğun istismar olunmasına başlayıb.