Azərbaycan, Bakı, 10 avqust /Trend/
ARDNŞ-in Ekologiya İdarəsi Azərbaycanın neft və qaz emalı müəssisələrində ekoloji monitorinqlər keçirib. Bu barədə ARDNŞ-in çərşənbə axşamı yayılan məlumatında deyilir.
Məlumatda deyildiyinə görə, Heydər Əliyev adına Bakı Neft Emalı, "Azərneftyağ" Neft Emalı, həmçinin, Qaz Emalı zavodlarında ekoloji monitorinq işləri həyata keçirilib. Monitorinqlər neft hasilatının və emalının təmizləyici sistemlərlə təmin olunma səviyyəsinin, eləcə də təmizləyici qurğu və avadanlıqların işlək vəziyyətinin səmərəliliyinin öyrənilməsi məqsədilə olub.
Monitorinq zamanı emal müəssisələrinin fəaliyyəti barədə dolğun məlumatlar toplanmış, ərazidəki çirkləndirici mənbələr, istehsal prosesində əmələ gələn çirkab suların həcmi və idarə olunması, həmçinin, ərazilərdə təmizləyici qurğu və avadanlıqların vəziyyəti araşdırılıb. Eyni zamanda, monitorinq üzrə alınmış təhlillərin laboratoriya şəraitində tədqiqi üçün təmizləyici qurğuların girişindən və çıxışından su nümunələri götürülüb və Kompleks tədqiqatlar laboratoriyasında aparılan analizlərin nəticələrinə əsasən, ekoloji tədbirlərin yerinə yetirilməsi üçün təkliflər hazırlanıb.
