Azərbaycan, Bakı, 8 oktyabr /Trend/
Yanvar-sentyabr aylarında Bakı-Tbilisi-Ceyhan (BTC) boru kəməri ilə 28 milyon ton neft nəql edilib. Ötən ilin analoji dövründə bu rəqəm 27,3 milyon tona yaxın təşkil edib. Bu barədə ARDNŞ-nin (Azərbaycan Respublikası Dövlət Neft Şirkəti) cümə günü yayılan məlumatında deyilir. Bu il sentyabrın 1-nə olan məlumata görə, neft kəmərinin işə başladığı vaxtdan BTC ilə 131,4 milyon ton neft nəql olunub.
Məlumatda deyildiyi kimi, sentyabrda BTC vasitəsilə 3,14 milyon tona yaxın neft nəql olunub.
Yanvar-sentyabrda Türkiyənin Ceyhan limanından dünya bazarlarına 27,9 milyon tona yaxın neft göndərilib. 2010-cu il oktyabrın 1-nə olan məlumata görə, BTC-nin işə başladığı vaxtdan etibarən onunla 132,5 milyon ton neft nəql edilib.
Məlumatda deyildiyi kimi, sentyabrda BTC ilə Ceyhan limanından dünya bazarlarına 3 milyon tona yaxın neft göndərilib.
BTC neft kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisində yerləşir. Boru kəmərinin tikintisinə 2003-cü ilin aprel ayında, onun neftlə doldurulmasına isə 2005-ci il mayın 18-də başlanılıb.
BTC-nin tikintisi dörd milyard dollara başa gəlib. Bu, inşaat işlərinə, boru kəmərinin doldurulmasına çəkilən xərclər və maliyyə xərcləridir. Bank faizlərinin ödənilməsi bura daxil deyil. Maliyyə kreditinin ümumi həcmi 2,6 milyard dollar təşkil edir.
BTC-nin səhmdarları BP (30,1 faiz), AzBTC (25 faiz), "Chevron" ( 8,90 faiz), "Statoil" (8,71 faiz), TPAO (6, 53 faiz), "Eni" (5 faiz), "Total" (5 faiz), "Itochu" (3,40 faiz), "Inpex" (2,50 faiz), "ConocoPhilips" (2,50 faiz) və "Hess" (2,36 faiz) şirkətləridir.
