Azərbaycan, Bakı, 12 noyabr /Trend, müxbir A.Axundov/
Xəzərin Azərbaycan sektorundakı "Şahdəniz" qaz-kondensat yatağında sutkalıq qaz hasilatı 23 milyon kubmetr təşkil edir. Bu barədə neft-qaz yatağındakı mənbə məlumat verib.
"Yataqda hasilat normal rejimdə aparılır və hazırda onun həcmi 23 milyon kubmetr təşkil edir", - mənbə deyib.
Hazırda qaz Cənubi Qafqaz qaz boru kəməri ilə (Bakı-Tbilisi-Ərzurum) Gürcüstana və Türkiyəyə nəql olunur, layihə çərçivəsində qazın bir hissəsini Azərbaycan alır.
Yataqda hasilatın ən yüksək həddinin 8,6-9 milyard kubmetr həcmində olacağı güman edilir. Proqnozlara əsasən, yatağın işlənməsinin ikinci mərhələsi çərçivəsində burada qaz hasilatının ildə 25 milyard kubmetrədək artırılacağı gözlənilir.
Bir müddət əvvəl BP-nin Türkiyədəki nümayəndəliyinin rəhbəri Can Sübhinin dediyi kimi, yatağın işlənməsinin ikinci mərhələsi çərçivəsində qaz hasilatına 2017-ci ildən başlamaq, 2020-ci ilədək yayla mərhələsinə çıxmaq planlaşdırılır.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.