Azərbaycan, Bakı, 30 noyabr /Trend, müxbir E.İsmayılov/
Yanvar-sentyabr aylarında Azərbaycanın dəniz yataqlar bloku "Azəri-Çıraq-Günəşli"dən (AÇG) neft hasilatı 64 quyuda aparılıb. Bu barədə layihənin operatoru qismində çıxış edən BP-nin hesabatında deyilir. Ümumilikdə bu dövrdə AÇG-də 30,8 milyon ton (228 milyon barel) neft hasil edilib.
İlin üç rübü ərzində "Çıraq" yatağında istismarda 21 quyu (15 neft hasil edən və 6 su basma quyusu) olub və bu dövrdə yataqda sutkalıq hasilat 98 min barelə yaxın təşkil edib.
"Mərkəzi Azəri" yatağında 18 quyu (13 neft hasil edən və 5 qaz basma quyusu) işləyib. İlin üç rübü ərzində bu yataqda orta sutkalıq hasilat 206,6 min barel olub.
"Qərbi Azəri" yatağında istismarda 21 quyu (15 neft hasil edən və 6 su basma quyusu) olub. Hesabat dövründə burada orta sutkalıq hasilat təxminən 252,8 min barel təşkil edib.
"Şərqi Azəri" yatağında 15 quyu istismar (10 neft hasil edən və 5 su basma quyusu) edilib. Yanvar-sentyabr ərzində sutkalıq hasilat 143,5 min barel təşkil edib.
Dərin sularda yerləşən "Günəşli"də istismarda 22 quyu (11 neft hasil edən və su basma quyusu) olub və sutkalıq hasilat 134,1 min barelə yaxın olub.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 34,1367 faiz iştirak payı), "ChevronTexaco" (10,2814 faiz), ARDNŞ (10 faiz), INPEX (10 faiz), "Statoyl" (8,5633 faiz), "ExxonMobil" (8,006 faiz), TPAO (6,75 faiz), "Devon Energy" (5,6262 faiz), "Itochu" (3,9205 faiz), "Delta Hess" (2,7213 faiz).
