Azərbaycan, Bakı, 17 dekabr/Trend, müxbir E.İsmayılov/
Gələn il ARDNŞ (Azərbaycan Respublikası Dövlət Neft Şirkəti) tullantıların utilizasiyası mərkəzinin yenidən qurulması çərçivəsində tikinti işlərinə başlamağı planlaşdırır. Bu barədə cümə günü ARDNŞ-nin Ekologiya İdarəsinin baş mühəndisi Yaqub Ağasiyev deyib.
Onun sözlərinə görə, hazırda ABŞ-ın Mİ-LLC şirkəti bu layihə çərçivəsində texniki-iqtisadi əsaslandırmanın (TİƏ) hazırlığı üzrə iş aparır.
"TİƏ-nin hazırlanması başa çatmaq üzrədir. O, başa çatandan sonra işçi layihə hazırlanacaq və 2011-ci ildə tikinti işlərinə başlanılacaq", - Ağasiyev qeyd edib.
Onun sözlərinə görə, yeni mərkəz sovet dövründən şirkətə miras qalan və neft şlamının saxlanılması üçün nəzərdə tutulan köhnə mərkəzin əsasında yaradılacaq. Yeni mərkəz neft şlamının emalı və 62 növ həm bərk, həm də sənaye tullantılarının emalı istiqamətində fəaliyyət göstərəcək.
Tullantıların utilizasiyası mərkəzi üçün TİƏ-nin hazırlanması üzrə müqavilə MI-LLC və ARDNŞ arasında mayın 20-də imzalanıb. Sənəd ARDNŞ-nin ekologiya məsələləri üzrə vitse-prezidenti Soltan Əliyev və MI-LLC şirkətinin vitse-prezidenti Sven Maykrans tərəfindən imzalanıb.
TİƏ-nin hazırlanması çərçivəsində ARDNŞ müəssisələrinin fəaliyyəti nəticəsində yaranan tullantıların həcmindən asılı olaraq, emal üzrə müvafiq texnologiyaların seçimi də nəzərdə tutulub.
İşlər ARDNŞ və ABŞ-ın Ticarət və İnkişaf Agentliyi (USTDA) arasında imzalanan 572 min dollar məbləğində qrant sazişi çərçivəsində həyata keçirilir.