Azərbaycan, Bakı, 17 dekabr /Trend, müxbir E.İsmayılov/
Dekabrın 16-na olan məlumata görə, "Şahdəniz" qaz-kondensat yatağının texniki operatoru olan BP şirkəti yataqda 6,8 milyard kubmetrə yaxın qaz hasil edib. Bu barədə cümə günü BP-dən deyiblər.
2010-cu il üçün "Şahdəniz" yatağında qaz hasilatı üzrə proqnoz 7,6 milyard kubmetr təşkil edir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%.
Hazırda qaz Gürcüstan və Türkiyəyə Cənubi Qafqaz qaz kəməri ilə nəql olunur.
Yataqda ən yüksək hasilat həddi 8,6-9 milyard həcmində nəzərdə tutulur. Proqnozlara əsasən, yatağın işlənməsinin ikinci mərhələsi çərçivəsində burada qaz hasilatı ildə 25 milyard kubmetrə çatdırıla bilər.