Azərbaycan, Bakı, 24 dekabr /Trend/
Dünən gecə Bakının Suraxanı rayonu ərazisindəki neft mədənləri sahəsində yanğın baş verib. Hadisə baş verən ərazi "Suraxani oil" əməliyyat şirkətinin balansındadır. Trend-in məlumatına görə, bu barədə cümə günü ARDNŞ-dən bildiriblər.
Məlumata görə, yanğın hasilat zamanı əldə edilən təbəqə suları gölündə baş verib.
"Yanğın təbəqə sularının alovlanması nəticəsində olub və qısa müddət ərzində söndürülüb", - ARDNŞ-dən bildiriblər.
Bu ərazinin işlənməsinə dair müqavilə 2005-ci ildə imzalanıb. Müqavilə çərçivəsində iştirak payının 75 faizi Rafi oil (BƏƏ) şirkətinə, qalan 25 faiz isə ARDNŞ-yə məxsusdur.